Nakigkita si bag-ong na-instalar nga PNP Regional Office 9 Director Police Brigadier General Elmer E Ragay sa mga lider sa Dipolog City ug Zamboanga del Norte niadtong milabay nga adlaw.
Kauban niini sa maong pakigkita sila Zamboanga del Norte Police Provincial Office Provincial Director Police Colonel Reydante E Ariza ug PNP Dipolog Chief of Police Police Lieutenant Colonel Kishna B Asaali.
Nakigtagbo sila kang Dipolog City Mayor Roberto Y. Uy ug Zamboanga del Norte Provincial Governor Darel Dexter T. Uy sa Governor’s Office sulod sa Provincial Capitol sa maong siyudad.
Tumong sa maong tigom ang pagpalig-on sa koordinasyon ug kooperasyon tali sa kapulisan ug lokal nga panggamhanan alang sa pagmintinar sa kalinaw ug kahapsay ug pagpalambo sa seguridad sa publiko sa Dipolog City ug tibuok probinsya.
Gihatagan usab og higayon sa maong tigom ang mga opisyal nga hisgutan ang padayong panagtinabangay sa PNP ug lokal nga panggamhanan sa pag-atiman sa kalinaw ug seguridad sa mga molupyo.(IKEN B. GULLEM)
Source: Dipolog City Government