Girepaso sa Sangguniang Panlungsod sa Dapitan City ang nagkalain-laing bayranan sa serbisyo ug paggamit sa mga pasilidad sa siyudad atol sa joint public hearing nga gihimo niadtong Abril 16 sa New Government Center.
Gipangunahan sa Committee on Rules and Revision of Ordinances ug Committee on Ways and Means ang maong hearing aron hisgutan ang mga proposed amendments ug ordinansa nga may kalabotan sa koleksyon sa fees ug pagdumala sa city-owned facilities.
Lakip sa gitutokan ang pag-amendar sa bayranan sa public toilets ug ang pagpatuman sa cottage rental fees. Gihisgutan usab ang proposed ordinance sa pag-regulate sa paggamit ug bayranan sa LED wall ug sound system nga gipanag-iya sa lokal nga gobyerno, aron masiguro ang husto nga paggamit ug patas nga singil sa mga mosalmot niini.
Dugang pa, gisusi sa konseho ang plano sa pag-establisar og management ug rental fees alang sa lawn tennis ug pickleball courts, nga usa sa mga recreational facilities sa siyudad nga padayon nga ginagamit sa publiko.
Apil usab sa agenda ang pag-update sa mga bayranan sa health services, lakip ang laboratory tests, dental services, ug radiology procedures, isip kabahin sa pag-amendar sa Dapitan City Revenue Code of 2024.
Sumala sa konseho, ang maong mga lakang nagtumong sa pag-standardize sa bayranan, pagpalig-on sa revenue generation, ug pagpasiguro nga ang mga serbisyo sa gobyerno magpadayon nga episyente ug mapuslanon alang sa katawhan.(IKEN B. GULLEM)
Source: Sangguniang Panlungsod of Dapitan City