Sulod sa duha ka adlaw nga ipahigayong assessment, gipakusgan sa Department of Agrarian Reform (DAR) sa Zamboanga del Norte ang pagmonitor sa performance ug accountability pinaagi sa ilang quarterly assessment human sa unang quarter sa 2026.
Gipangulohan ni Daisy Dell Suan Digamon, ang kalihokan nagtigom sa tanang Municipal Agrarian Reform Program Officers (MARPOs) aron susihon ang kahimtang sa implementasyon sa mga programa sa agrarian reform sa probinsya.
Gitutokan sa assessment ang progreso sa mga importanteng programa sama sa Land Acquisition and Distribution (LAD), post-land distribution services, leasehold operations, ug suporta sa mga mag-uuma lakip ang Project SPLIT.
Sa unang adlaw, gipresentar sa lain-laing dibisyon ang ilang report lakip ang Land Tenure Improvement Division (LTID), Legal Division, ug Support to Operations Division (STOD), aron ipakita ang aktwal nga kahimtang sa implementasyon ug matubag ang mga hagit nga giatubang sa field officers.
Sumala sa DAR, ang resulta sa assessment ipasulod sa Office Performance Commitment and Review (OPCR) aron magamit sa paghimo og polisiya ug desisyon nga base sa datos. Kini kabahin sa paningkamot sa ahensya nga mapalig-on ang transparency ug accountability sa serbisyo publiko.(IKEN B. GULLEM)
Source: DAR Zamboanga del Norte Provincial News Network