Trenta’y sais ka probationers ug parolees sa Dapitan nakabenepisyo sa usa ka espesyal nga skills training sa air conditioning maintenance, isip kabahin sa programa sa syudad alang sa rehabilitasyon ug panginabuhian, nga gipatuman sulod sa duha ka adlaw nga training niadtong Abril 15–16 sa Pavilion Hotel, nga gipangulohan sa City Government of Dapitan pinaagi sa Parole and Probation Office.
Sumala ni Chief Probation and Parole Officer Nelson C. Bedua, dako og papel ang skills training sa pagbag-o sa kinabuhi sa mga kliyente, ilabi na sa pag-andam kanila alang sa trabaho ug responsableng pagbalik sa komunidad.
Ang pagbansay gipahigayon uban sa pakigtambayayong sa Technical Education and Skills Development Authority (TESDA) ug Department of Labor and Employment (DOLE).
Tumong sa maong programa nga mapalambo ang kahigayunan sa trabaho sa mga partisipante ug masuportahan ang ilang malampusong reintegrasyon sa katilingban. Gilauman usab nga makatabang kini sa pagpakunhod sa pagbalik sa krimen ug sa pagpalig-on sa kalinaw ug kahapsay sa syudad.
Kini nga kalihokan kabahin sa Livelihood and Education Access Program (LEAP) sa Department of Justice – Parole and Probation Administration, nga naghatag og oportunidad sa edukasyon ug lig-on nga panginabuhian alang sa mga probationers ug parolees.(IKEN B. GULLEM)
Source: City Government of Dapitan