Nagpahimangno ang Cebu Police Provincial Office sa publiko bahin sa kamahinungdanon sa online safety aron malikayan ang mga krimen sa internet.
Sumala sa ilang gipagawas nga impormasyon, gi-awhag ang mga netizens nga magbantay ug mosunod sa yano apan epektibong mga paagi aron maprotektahan ang ilang kaugalingon samtang naggamit sa internet.
Una, gidasig ang paggamit og lig-on ug lahi-lahi nga passwords sa matag account. Kinahanglan kini maglangkob og kombinasyon sa dagko ug gagmay nga letra, numero, ug simbolo aron lisod kini ma-hack.
Ikaduha, pasidaan sa publiko nga maglikay sa pag-click sa mga kadudahang links ug emails nga mahimong gigikanan sa phishing scams.
Gikinahanglan nga siguruhon una ang tinubdan sa mensahe sa dili pa maghatag og personal nga impormasyon.
Ikatulo, gipahinumduman ang tanan nga dili basta-basta maghatag sa sensitibong personal nga datos sama sa adress, birthday, ug bank details sa online platforms aron malikayan ang identity theft ug uban pang panikas.
Ug ikaupat, girekomendar ang paggamit sa two-factor authentication o 2FA isip dugang proteksyon sa mga account, diin kinahanglan pa og laing verification sama sa code nga ipadala sa cellphone.
Gipasabot sa kapulisan nga pinaagi sa pagmatngon ug disiplina sa paggamit sa internet, malikayan ang daghang cybercrime ug mapanalipdan ang kaugalingong impormasyon sa digital nga kalibutan.
Source: CPPO
I via Renante Socia Lada