Gisaulog sa Cebu City ang ika-89 nga Charter Day niadtong Pebrero 24, 2026 pinaagi sa usa ka solemne nga seremonya nga gipahigayon sa Plaza Sugbo. Ang maong selebrasyon maoy paghinumdom sa pagkahimong chartered city sa Sugbo niadtong 1937.
Nagsugod ang programa sa usa ka Misa nga gipangulohan ni Rev. Fr. Josephus Remonde. Gitambongan kini sa mga opisyal sa siyudad, mga department head, empleyado sa gobyerno, uniformed personnel, ug mga representante gikan sa nagkadaiyang ahensya sa nasyonal nga gobyerno.
Human sa misa, gipahigayon ang wreath-laying ceremony nga gipangulohan ni Mayor Nestor Archival. Nirepresentar usab si Vice Mayor Tomas Osmeña pinaagi sa iyang Chief of Staff nga si Raymund Paul Taboada, samtang mitambong usab si CCPO Director PCol. George Ylanan. Ang maong seremonya simbolo sa pagpasidungog sa mga lider ug indibidwal nga nakatampo sa kalamboan sa siyudad.
Sa iyang mensahe, giingon ni Mayor Archival nga ang city charter dili lamang usa ka dakong hitabo sa kasaysayan sa Sugbo, kundili usa usab ka pahinumdom sa responsibilidad sa mga lider sa pagpadayon sa maayong pagdumala ug matinud-anong pagserbisyo sa katawhan. Giawhag niya ang mga Sugboanon nga magpabiling nagkahiusa alang sa padayong kalamboan sa siyudad.
Ang Charter Day gisaulog matag Pebrero 24 isip paghinumdom sa paghatag og political autonomy sa siyudad ubos sa Commonwealth Act No. 58 niadtong 1937. Ang maong adlaw giila usab isip special non-working holiday sa Cebu City.
Source: Cebu City PIO
I via Renante Socia Lada