Miabot og unom ka oras ang meeting sa Cebu Provincial Health Board (PHB), nga mao na ang pinakataas sukad pagsugod sa administrasyon ni Gov. Pamela Baricuatro. Sumala sa mga opisyal, nagpakita kini nga daghan pang buhaton aron mapaayo ang sistema sa panglawas sa probinsya.
Matod ni Dr. Nikki Catalan, health consultant sa Capitol, dili sayon ang pag-usab sa health system. Dugay, teknikal ug usahay lisod ang proseso, apan importante kini aron masiguro ang dugayng kaayohan sa tanang Sugboanon.
Lakip sa gihisgutan ang kahimtangan sa mga ospital nga gipadagan sa kapitolyo, mga programa sa komunidad, ug ang padayon nga medical ug surgical missions sa mga lugar nga kulang og serbisyo medikal.
Gituki usab ang pagpadayon sa Health Facility Development Plan alang sa mga provincial hospitals ug ang pagpalig-on sa road safety programs isip kabahin sa preventive health efforts.
Usa sa mga dakong agenda mao ang pagsuporta sa pormal nga pagtukod sa New Life Cebu Drug Rehabilitation Center nga ipahimutang sa Dr. Jose Ma. V. Borromeo Memorial Hospital sa lungsod sa Pinamungajan.
Tumong niini nga mapalambo ang serbisyo alang sa mga adunay problema sa paggamit og ilegal nga drogas ug mapalig-on ang mental health ug recovery programs sa probinsya.
Gipresentar usab ang plano nga pakigtambayayong sa Ramon Aboitiz Foundation Inc. alang sa mga community-based programs ug malungtarong mga inisyatiba sa panglawas.
Gipasiugda sa board ang importansya sa panaghiusa sa lain-laing sektor aron mas mapalambo ang serbisyo medikal sa tibuok probinsya.
Sa laing bahin, gihisgutan usab ang electronic referral o e-referral system sa probinsya.
Gitambongan kini sa pipila ka mayor ug miyembro sa 17th Sangguniang Panlalawigan. Gipakita sa mga health officials ang datos sa referral, paggamit sa sistema, ug mga kakulangan nga nakaapekto sa maayong pagpadagan sa mga pasyente.
Sa katapusan, giaprubahan sa PHB ang resolusyon sa pagtukod sa Cebu Province Health Referral Committee aron mas mapalig-on ang koordinasyon sa mga ospital ug health facilities. Tumong niini nga masiguro nga ang mga pasyente madawat dayon sa hustong ospital ug makakuha og angay nga pag-atiman sa tukmang oras.
Source: Cebu Province PIO
I via Renante Socia Lada