Nagpatuman og temporaryong moratorium ang Department of Agriculture sa pag-isyu og DA Certification alang sa Land-Use Reclassification sa tanang Local Government Units sa Zamboanga Peninsula, lakip ang Dapitan City.
Sumala sa Department Circular No. 1, Series of 2026, epektibo dayon ang maong moratorium ug magpadayon hangtod Hunyo 2026 gawas kung adunay bag-ong direktiba nga ipagawas ang DA.
Tumong sa polisiya nga maprotektahan ang mga agricultural land ug masiguro nga ang paggamit sa yuta nahiuyon sa National Food Security Agenda. Pinaagi sa pagsuspenso sa pagdawat og bag-ong aplikasyon sa land reclassification, likayan ang pag-convert sa produktibong uma ngadto sa dili agricultural nga gamit nga posibleng makaapekto sa lokal nga produksyon sa pagkaon.
Sa panahon sa moratorium, dili modawat og bag-ong aplikasyon alang sa DA Certification sa land reclassification. Apan, ang mga aplikasyon nga na-file sa wala pa magsugod ang circular padayon nga iproseso sumala sa kasamtangang mga lagda. Ang mga pending appeals sa Office of the Secretary ipahigayon lamang human ma-lift ang moratorium.
Giawhag ang tanang LGUs ug mga hingtungdan nga opisina sa pagsunod sa direktiba ug paghunong sa bisan unsang endorsement o aksyon nga nanginahanglan og DA Certification hangtod matapos ang moratorium.(IKEN B. GULLEM)
Source: City Government of Dapitan