Nahimong unang lokal nga panggamhanan sa Zamboanga del Norte ang Municipality of Siayan nga opisyal nang nag-operate sa Electronic Local Government Unit (eLGU) Version 2 System, usa ka lakang padulong sa mas moderno ug episyenteng paghatag og serbisyo publiko.
Gilunsad sa Department of Information and Communications Technology (DICT) Region IX ug BASULTA ang maong sistema uban sa pagtambong sa mga opisyal sa lokal nga panggamhanan, mga partner agencies, ug mga stakeholder nga nagpakita og suporta sa digital transformation sa munisipyo.
Gawas nga unang LGU sa probinsya, ang Siayan usab ang ikaupat nga lokal nga panggamhanan sa Region IX nga nakapatuman sa eLGU Version 2 System, nga adunay mga serbisyo sama sa SMS Notification System, eCedula, eLCR, eNews, eGovPay, ug Business Permits and Licensing System (BPLS).
Gilauman nga pinaagi sa maong digital platform, mas mapadali ang mga transaksyon sa gobyerno, mas mapalapdan ang access sa mga serbisyo, ug mas mapalig-on ang transparent ug responsive nga pagdumala alang sa mga residente ug negosyo sa Siayan.(IKEN B. GULLEM)
Source: DICT IX BASULTA