Opisyal nang magamit sa mga residente ang bag-ong konkretong dalan sa Purok 2A, Barangay Daanglungsod human giturn-over sa Local Government Unit sa Katipunan ang ₱2 milyon nga Road Concreting Project niadtong Hunyo 23.
Gipangulohan ang turnover ni Mayor Maiko Wong ug gitambongan ni Congresswoman Irene C. Labadlabad, Board Member Chady Yebes, mga miyembro sa Sangguniang Bayan, mga opisyal sa barangay, ug mga residente sa komunidad.
Gilauman nga ang maong proyekto makapahapsay sa pagbiyahe sa mga lumulupyo, makapadali sa transportasyon sa mga produkto ug serbisyo, ug makapalig-on sa koneksyon sa komunidad ngadto sa ubang mga lugar.
Kabahin kini sa padayon nga paningkamot sa LGU Katipunan sa pagpalambo sa imprastraktura ug paghatag og mas maayong serbisyo alang sa mga lumulupyo.(IKEN B. GULLEM)
Source: BAG-ONG KATIPUNAN