Gidala sa Local Government Unit sa Salug ang nagkalain-laing serbisyo ngadto sa mga residente sa Barangay Poblacion pinaagi sa community caravan niadtong nilabay nga adlaw. Gipangulohan ni Mayor Dr. Ruth Brillantes uban sa suporta nila Dr. Mery Jean E. Bendijo, Dr. Cherry Lou Bareng, ug Mrs. Ailyn Lomarda ang maong kalihokan aron mapaduol ang serbisyo sa gobyerno ngadto sa katawhan.
Usa sa mga gipasiugdang programa sa caravan ang Benteng Bigas Program nga nagtanyag og mas barato nga bugas ubos sa konsepto nga “Rice for All” aron makatabang sa mga pamilya batok sa pagsaka sa gasto sa panginahanglanon sa pagkaon.
Gipahigayon usab ang Yakap Konsulta Caravan sa Rural Health Unit ug Feeding Program sa Municipal Nutrition Office diin nakadawat ang mga residente og libreng serbisyong medikal ug masustansiyang pagkaon. Mitampo usab ang Agriculture Office pinaagi sa pag-apod-apod og libreng binhi alang sa mga mag-uuma, samtang naghatag usab ang Municipal Civil Registrar Office og libreng rehistro nga serbisyo.
Pinaagi sa pakigtambayayong sa Barangay Health Workers ug mga health personnel sa Barangay Poblacion, nahimong mas duol ug mas maabot sa mga residente ang nagkalain-laing serbisyo sa lokal nga panggobyerno isip pagpanguna sa pag-atiman sa panginahanglan sa komunidad.JENIFFER JR. DELICA)
Source: Municipality of SALUG