Gidala sa Cebu City ang pito ka pasyente gikan sa Zamboanga del Norte alang sa operasyon ug espesyal nga pagtambal isip kabahin sa paningkamot sa administrasyon ni Governor Darel Dexter Uy sa paghatag og tukmang medikal nga tabang. Nahitabo kini sa unang semana sa Hulyo atol sa selebrasyon sa unang tuig sa Uy Administration.
Gitabangan mismo ni Herdina Gallegos, Head sa ZNMC Medical Team, uban ni Medical Team Ambulance Driver Sir Clyde Giangan ang pagbiyahe sa mga pasyente padulong sa Cebu City. Giubanan kini ubos sa giya ug padayong suporta ni ZNMC Administrator Dra. Esmeralda Nadela aron masiguro ang ilang luwas nga transportasyon ug pag-atiman.
Kabahin kini sa mga lakang aron mapadali ang paghatag og serbisyo medikal, ilabi na sa mga pasyenteng nanginahanglan og operasyon ug espesyalista nga pagtambal nga dili available sa ilang lugar.
Gipahayag sa Zamboanga del Norte Medical Center nga ang maong inisyatiba nagpakita sa padayong paningkamot sa Uy Administration sa paghatag og mas maabot, maloloy-on, ug paspas nga serbisyong panglawas para sa katawhan sa probinsya.(JENIFFER JR. DELICA)
Source: Zamboanga del Norte Medical Team