SALUG, Zamboanga del Norte — Gidala sa Local Government Unit sa Salug ang nagkalain-laing batakang serbisyo ngadto sa mga residente sa Barangay Dinuan pinaagi sa Serbisyo Caravan nga gipangulohan ni Mayor Dr. Ruth Brillantes niadtong Hunyo 11.
Usa sa mga nag-unang kalihokan mao ang Benteng Bigas Program nga nagtanyag og barato nga bugas ngadto sa mga pamilya aron makatabang sa pagpakunhod sa epekto sa pagsaka sa presyo sa pagkaon ug masiguro nga adunay igong suplay sa ilang panimalay.
Gipahigayon usab ang Yakap Konsulta Caravan sa Rural Health Unit ug Feeding Program sa Municipal Nutrition Office diin daghang residente ang nakadawat og libreng medikal nga serbisyo ug masustansyang pagkaon isip kabahin sa kampanya alang sa mas maayong panglawas sa komunidad.
Dugang pa, namahagi ang Municipal Agriculture Office og libreng binhi alang sa mga mag-uuma samtang naghatag usab og libreng registration services ang Municipal Civil Registrar’s Office aron mapadali ang pagkuha sa importante nga mga dokumento.
Pinaagi sa aktibong partisipasyon sa mga barangay health workers ug mga kawani sa panglawas, malampusong naduol sa katawhan ang mga serbisyo sa gobyerno ug napalig-on ang pag-atiman sa panginahanglan sa komunidad.(JENIFFER JR. DELICA)
Source: Municipality of SALUG