Mas gipaduol ngadto sa mga residente sa Barangay Soguilon,Siayan Zamboanga del Norte ang nagkalain-laing serbisyo sa lokal nga panggobyerno pinaagi sa Barangay Visitation Serbisyo Caravan 2026 nga gipahigayon niadtong Septiyembre 6,2026.
Gipangulohan ni Mayor Alberto J. Bongcawel, uban ni Hon. Atty. Crisologo A. Decierdo, mga miyembro sa Sangguniang Bayan ug mga kawani sa LGU-Siayan ang paghatod sa mga serbisyo diretso sa barangay aron mas sayon alang sa mga residente ang pagkuha sa gikinahanglang tabang.
Lakip sa mga serbisyo nga gihatag mao ang Rice Subsidy Assistance, AKAP ug LGU-POF Assistance, Pakaon sa Masa, relief goods ug dokumento assistance alang sa mga kwalipikadong benepisyaryo.
Pinaagi sa maong programa, gitumong sa LGU-Siayan nga dili na kinahanglan nga moadto pa sa sentrong bahin sa lungsod ang mga residente aron lamang makapangayo og tabang o serbisyo.
Gipasiugda usab sa lokal nga panggobyerno nga ang pagbisita sa matag barangay usa ka paagi aron mas direktang madungog ang panginahanglan sa mga residente ug matubag kini pinaagi sa angay nga mga programa ug serbisyo.
Gilauman nga ipadayon ang maong inisyatibo sa ubang barangay sa Siayan isip kabahin sa paningkamot sa lokal nga panggobyerno nga mapaduol pa ang serbisyo publiko ngadto sa katawhan.(MEDALYN U. BORJA)
Source: SikatSiayan