Opisyal nga miapil ang City Government of Dapitan sa National Commission for Culture and the Arts (NCCA) sa pagsaulog sa National Arts Month (NAM) 2026 ning bulan sa Pebrero, uban ang tema nga “Ani ng Sining: Katotohanan at Giting.”
Sumala sa Presidential Proclamation No. 683, ang National Arts Month gitumong sa pagpalig-on sa pag-ila ug pagpanalipod sa dato nga kultural nga panulondon sa nasod. Gipasidunggan usab niini ang dakong papel sa arts sa pagtukod og malinawon nga komunidad, matarong nga panggobyerno, ug malungtarong kalamboan.
Pinaagi sa musika, biswal nga arts, literatura, pasundayag, ug uban pang porma sa mamugnaong pagpahayag, gisaulog sa Dapitan City ang gahum sa arts sa pagdasig sa kalinaw, panaghiusa, ug progreso.
Sa pagsaulog sa National Arts Month, nanawagan ang lokal nga panggobyerno sa padayon nga suporta alang sa mga lokal nga artista ug cultural workers, ug sa pagpadayon sa espiritu sa pagkamamugnaon nga maggiya sa usa ka mas makiangayon, mauswagon, ug lig-on nga katilingban.(IKEN B. GULLEM)
Source: City Government of Dapitan