Giawhag karon sa Department of Science and Technology (DOST) Zamboanga del Norte ang mga kwalipikado ug adunay potensyal sa natad sa siyensya ug matematika nga moapil sa DOST Science Education Institute (SEI) Undergraduate Scholarship Examination, nga ipahigayon sa Nobyembre 14–15, 2026.
Sa iyang sulat ngadto kang Governor Darel Dexter Uy, gihangyo ni DOST Zamboanga del Norte Provincial Director Nuhman Aljani ang suporta sa provincial government sa pagsabwag sa impormasyon kabahin sa maong scholarship program, ilabina alang sa mga estudyanteng adunay tinguha ug katakos nga mopadayon sa ilang pagtuon ug propesyon sa natad sa Science, Technology, Engineering, and Mathematics (STEM).
Matud ni Provincial Director Aljani, ang mga kwalipikadong aplikante mahimong makapahimulos sa Republic Act No. 7687 o Science and Technology Scholarship Act of 1994, nga nagtumong sa paghatag og oportunidad sa mga estudyanteng gikan sa mga pamilyang nakab-ot ang gitakdang socio-economic requirements.
Ang mga makadawat sa scholarship ubos sa maong programa gilauman nga mopadayon sa mga prayoridad nga kurso sa basic ug applied sciences, engineering, ug science o mathematics teaching.
Samtang, ang DOST-SEI Merit Scholarship gitumong alang sa mga estudyanteng adunay talagsaong abilidad sa science ug mathematics ug adunay lig-ong determinasyon sa pagtukod og propesyon sa natad sa siyensya ug teknolohiya.
Bukas ang duha ka scholarship program alang sa tanang graduating Grade 12 students sa School Year 2026–2027 nga naa sa STEM Strand.(IKEN B. GULLEM)
Source: Zamboanga del Norte Provincial News Network