Usa ka dakong tabang sa adlaw-adlaw nga panginahanglan sa pagkaon ang nadawat sa 440 ka panimalay gikan sa 16 ka barangay sa La Libertad, Zamboanga del Norte pinaagi sa Local Government Support Fund–Financial Assistance to Local Government Units (LGSF-FALGU) Rice Distribution Project.
Ubos sa maong programa, matag panimalay makadawat og 10 kilos nga bugas matag bulan sulod sa upat ka bulan, gikan Agosto hangtod Nobyembre, nga mokabat sa 40 kilos nga bugas matag benepisyaryo.
Gipahigayon ang pag-apod-apod niadtong Septiyembre 8 sa La Libertad Gymnasium, diin nanguna ang Provincial Social Welfare and Development Office (PSWDO), uban sa Municipal Social Welfare and Development Office (MSWDO) sa La Libertad.
Gipasalamatan sa mga benepisyaryo nga sila Cresencia B. Zamora, 74 anyos, taga-Purok 1, Barangay El Paraiso; Leonilo T. Clamohoy, 66 anyos, taga-Purok 3, Barangay Singaran; ug Lolita M. Gumate, 65 anyos, taga-Barangay Sta. Cruz, ang maong ayuda nga ilang magamit alang sa ilang inadlaw-adlaw nga panginahanglan.
Sumala sa mga benepisyaryo, dako ang ikatabang sa libreng bugas sa pagpagaan sa ilang gasto sa pagkaon ug sa pagtagbo sa panginahanglan sa pamilya.
Mipadayag usab sa iyang pagpasalamat si Barangay Singaran Kapitan Irene M. Esparcia kang Presidente Ferdinand “Bongbong” Marcos Jr., sa Provincial Government of Zamboanga del Norte ubos sa pagpangulo ni Governor Darel Dexter T. Uy, ug sa lokal nga pangagamhanan sa La Libertad tungod sa ilang suporta sa programa.
Pinaagi sa koordinasyon sa nagkalain-laing lebel sa pangagamhanan, padayon nga gipalig-on ang mga programa nga nagtumong sa paghatag og direktang tabang sa mga pamilyang nanginahanglan ug sa pagsiguro nga adunay igo ug lig-on nga suplay sa pagkaon sa komunidad.(IKEN B. GULLEM)
Source: Zamboanga del Norte Provincial News Network