Gitan-aw sa Provincial Government of Zamboanga del Norte ang posibleng pagtukod og alternate naval facility sa probinsya isip lakang sa pagpalig-on sa maritime security nga mahimong moabli usab og dugang nga oportunidad alang sa ekonomiya ug kalamboan.
Gihisgutan ni Governor Darel Dexter T. Uy uban sa mga opisyal sa Armed Forces of the Philippines (AFP) ang posibilidad sa pagtukod sa maong pasilidad atol sa usa ka exploratory discussion bag-ohay lang.
Tungod sa estratehikong lokasyon sa Zamboanga del Norte ubay sa importanteng mga sea lane, gilauman nga ang posibleng naval facility makatabang sa pagpanalipod sa mga ruta sa trade ug shipping, pagpalig-on sa maritime domain awareness, ug pagpauswag sa disaster response ug humanitarian operations.
Gitan-aw usab ang maong inisyatiba isip oportunidad sa pagdani og mga pamuhunan, pagmugna og trabaho, ug pagpalihok sa lokal nga ekonomiya, samtang mapadayon ang kalinaw ug seguridad sa probinsya.
Mitambong sa maong diskusyon sila Vice Governor Julius Napigquit, Board Member Jojo Documento, ug Provincial Disaster Risk Reduction and Management Officer (PDRRMO) Arvin Bonbon, uban sa mga opisyal sa Philippine Army ug Philippine Navy.(IKEN B. GULLEM)
Source: Gov. Darel Uy