Nagpahayag og pagsalig si Agriculture Secretary Francisco Tiu Laurel, Jr. sa mga paningkamot ni 3rd District Congressman Adrian Amatong sa pagpangita og dugang nga suporta alang sa mga mag-uuma sa probinsiya atol sa Budget Hearing.
Gipasiugda ni Cong. Amatong ang panginahanglan sa mas patas ug mas dako nga suporta gikan sa Department of Agriculture (DA), ilabina sa pagpalambo sa Farm-to-Market Roads (FMR) aron mapadali ang pagdala sa mga produktong pang-agrikultura ngadto sa mga merkado.
Gipahayag sa kongresista nga aktibong gisuportahan sa gobernador ug mga mayor ang mga programa alang sa kalamboan sa probinsiya. Iyang gipunting nga mas dako ang panginahanglan sa iyang distrito tungod kay kini adunay pinakalapad nga land area, nga nanginahanglan og mas lig-on nga farm-to-market road network.
Gipadayag usab ni Secretary Laurel ang plano sa PAIC Roxas alang sa pagtukod og major port nga mahimong gamiton sa pagpadala sa mga produktong pang-agrikultura, uban sa pag-establisar og food hub.
Gipasalig ni Laurel nga ipadayon sa Department of Agriculture ang suporta sa mga programa sa rehiyon nga nagtumong sa pagpalig-on sa agrikultura ug pagpauswag sa panginabuhi sa mga mag-uuma sa probinsiya.(IKEN B. GULLEM)