Gipahinumdoman sa lokal nga pangagamhanan sa Dapitan City ang publiko nga mag-amping tungod sa naobserbahang haze sa maong lugar, nga mahimong makaapekto sa visibility ug kalidad sa hangin.
Gina-awhag ang mga residente nga limitahan ang paggawas kung baga ang haze. Kung kinahanglan gayud mogawas, girekomenda ang pagsul-ob og N95-type mask, pag-inom og igo nga tubig, ug paglikay sa dugay nga pagpabilin sa gawas.
Gipahimangnoan usab ang mga motorista nga maghinay ug magmatngon sa pagmaneho, ilabina kung ubos ang visibility tungod sa haze.
Kinahanglan usab nga hatagan og dugang pagtagad ang mga tigulang, gagmayng bata, mabdos, immunocompromised nga mga tawo, ug mga adunay asthma, COPD o sakit sa kasingkasing, tungod kay mas sensitibo sila sa dili maayong kalidad sa hangin.
Kung makasinati og lisod nga pagginhawa, grabeng o padayon nga ubo, iritasyon sa mata, ilong o tutunlan, o kasakit sa dughan, pangayo dayon og medikal nga tabang.
Padayon nga magsubay sa opisyal ug kasaligan nga health advisories alang sa pinakabag-ong impormasyon ug mga rekomendasyon. Ang pag-amping ug hustong impormasyon importante aron mapanalipdan ang panglawas sa tanan atol sa haze.(IKEN B. GULLEM)
Source: Dapitan City Government