Pormal nga gisugdan sa City Government of Dapitan ang selebrasyon sa Philippine Creative Industries Month (PCIM) 2026 atol sa regular nga Flag-Raising Ceremony sa Dapitan City Hall Lobby niadtong Septiyembre 1.
Kabahin sa opening program ang cultural performances sa JRMSU Lundayan Dance Troupe ug Lundayan Choristers, nga nagpakita sa talento, pagkamamugnaon ug artistic skills sa mga batan-ong performers sa Dapitan.
Gipasiugda usab sa maong kalihokan ang importante nga papel sa kabatan-onan ug mga institusyong pang-edukasyon sa pagpreserbar ug pagpalambo sa kultura ug adunahang cultural heritage sa siyudad.
Gipasalig sa City Government ang pag-ila ug suporta sa mga lokal nga artists, cultural workers, performers ug creatives nga nagpadayon sa pagpalig-on sa cultural identity ug tourism sa Dapitan.
Ang Philippine Creative Industries Month gisaulog matag Septiyembre subay sa Republic Act No. 11904 o Philippine Creative Industries Development Act, nga nag-ila sa dakong kontribusyon sa mga artista, artisan, performers, designers, innovators ug cultural workers sa nasud.
Sa Dapitan, ang selebrasyon nagpunting sa pagpalambo sa lokal nga kultura, tradisyon, artistic expressions ug tourism initiatives pinaagi sa pakigtambayayong sa mga artista, komunidad ug nagkalain-laing stakeholders.
Ang maong opening nagsugod sa usa ka bulan nga selebrasyon nga nagtumong sa paghatag og bili sa art, culture, innovation ug Filipino creativity, samtang gipadayon sa Dapitan ang pagpreserbar sa iyang heritage ug pagpalambo niini pinaagi sa bag-ong mga ideya ug inobasyon.(IKEN B. GULLEM)
Source: Dapitan City Government