Gipahibalo sa Provincial Government sa Zamboanga del Norte pinaagi sa Provincial Social Welfare and Development Office ang schedule sa pag-apod-apod sa LGSF-FALGU Rice Project alang sa mga kwalipikadong benepisyaryo sa nagkalain-laing lungsod ug dakbayan sa probinsya.
Giawhag ang mga benepisyaryo nga motungha sa ilang gitakdang petsa, oras, ug lugar sa distribusyon ug magdala og balido nga government-issued ID aron hapsay nga madawat ang ilang bugas nga ayuda. Gihangyo usab sila nga mosunod sa mga panudlo sa mga kawani sa Provincial Social Welfare and Development Office ug sa lokal nga panggamhanan atol sa distribusyon.
Base sa gipagawas nga schedule, himuon ang distribusyon sa Piñan sa Hulyo 27, sa Sibutad ug La Libertad sa Hulyo 28, sa Dapitan City sa Hulyo 30, ug sa Mutia ug Rizal sa Agosto 4.
Sumala sa Provincial Government, kabahin ang LGSF-FALGU Rice Project sa padayon nga paningkamot sa administrasyon ni Governor Darel Dexter T. Uy sa pagpalig-on sa food security ug paghatag og suporta sa mga pamilyang nanginahanglan sa tibuok Zamboanga del Norte.(JENIFFER JR. DELICA)
Source: Zamboanga del Norte Provincial News Network