Malampusong gipahigayon sa Sangguniang Bayan sa Salug ang ilang regular session diin gihisgutan ug gitamdan ang nagkadaiyang mga ordinansa, resolusyon, ug mga hangyo nga may kalabutan sa padayon nga kalamboan sa lungsod.
Lakip sa mga nahisgotan ang mga ordinansa ug resolusyon alang sa unang ug ikaduhang pagbasa, sama sa supplemental budget sa Barangay Calucap, mga kasabutan sa Philippine Carabao Center ug mga health service providers, suporta sa rehabilitasyon sa flood control structure sa Poblacion East, ug pag-aprubar sa pipila ka barangay ug SK ordinansa.
Gipabilin usab sa mga komite alang sa dugang pagtuon ang mga gisugyot nga ordinansa batok sa pagbaligya og pharmaceutical products sa sari-sari stores, pagpugong sa pirated ug counterfeit goods, pagdili sa topless o half-naked sa pampublikong lugar, ug pagtakda sa mga parking area sa nagkalain-laing sakyanan.
Sa maong sesyon, giaprubahan usab ang mga resolusyon nga nagtugot sa LGU Salug sa pagpirma og Memorandum of Agreement (MOA) uban sa Saint Joseph College of Sindangan ug Colegio de San Francisco Javier alang sa social work internship program, ingon man ang paghatag og tulo ka tuig nga legislative franchise sa upat ka tricycle operators sa lungsod.(IKEN B. GULLEM)
Source: Office of the Vice Mayor Municipality of Salug