Malampusong nasikop sa mga personahe sa kapulisan ang usa ka suspek nga nag atubang sa kasong Anti-VAWC homan malambigit kini sa pagpanghulga sa pagpatay sa iyang asawa ug anak mga alas 11:15 sa gabii niadtong Hunyo 28, 2026, didto sa Purok Anduhaw, Barangay Polo, Dapitan City, Zamboanga del Norte.
Ang maong suspek naila nga usa ka 59 anyos nga lalaki,nga residente sa nasangpit nga lugar kinsa gidakop pinaagi sa mga personahe sa Dapitan City Police Station (CPS) tungod sa giingong paglapas sa Republic Act No. 9262, nailhan usab nga Anti-Violence Against Women and Their Children (Anti-VAWC) Act of 2004.
Ang pagdakop sa nasangpit nga suspetsado naggikan sa usa ka hangyo alang sa tabang sa kapulisan nga nadawat mga alas 11:10 sa gabii gikan sa asawa sa suspek, kinsa nagtaho nga siya ug ang iyang mga anak gihulga sulod sa ilang pinuy-anan nga miresulta sa pagkasikop sa suspek sa mga miresponde nga mga pulis homan madawat ang report.
Sa inisyal nga imbestigasyon nagbutyag nga ang suspek giingong naghulga nga patyon ang iyang asawa ug ang ilang kamagulangang anak atol sa usa ka mainit nga panaglalis sa panimalay.
Giingong misulay usab siya sa pag-atake sa iyang asawa ug menor de edad nga anak nga babaye gamit ang bolo human gidid-an sila sa pagpakigsulti sa mga tawo sa gawas sa ilang panimalay.
Ang dali nga interbensyon sa pulis nakapugong sa paglala sa sitwasyon, ug ang mga biktima wala maunsa.
Ang suspek gipahibalo sa hinungdan sa iyang pagkadakop ug mga katungod sa konstitusyon sa pinulongan nga iyang nasabtan ug gidala dayon sa Jose Rizal Memorial Hospital alang sa medikal nga eksaminasyon ug karon anaa na sa kustodiya sa Dapitan City Police Station samtang nagpaabot sa pagpasaka sa angay nga mga kaso sa korte.(MEDALYN U. BORJA)
Source: ZNPPO