Kusganong gikondinar sa Provincial Disaster Risk Reduction Management Council sa Zamboanga del Norte ang Sangguniang Panlalawigan sa gihimo niining pagsalikway nga madeklarar nga ipa-ilawom sa State of Calamity ang tibook probinsiya.
Kini ang unod sa gipanday nga resolusyon sa disaster council sa ilang panagtagbo kagahapong adlawa.
Unang mipadas-og sa mosyon si Mr. Peter Recososa ang presidente sa KABALIKAT CIVICOM usa ka civil society organization ug regular member sa Provincial Disaster Risk Reduction Management Council sa pagkondina sa Sangguniang Panlalawigan sa probinsiya atubangan sa salawayon niining aktuwasyon nga misalikway sa ilang resolusyon nga nagrekomendar para ipa-ilawom sa state of calamity ang tibook probinsiya tungod sa epekto sa El Nino.
Ang mosyon ni Mr. Recososa hinugpong nga gidasonan sa tanang meyembro sa disaster council.
Sa sayu pa si Governor Rosalina “Nanay Nene” Jalosjos mipasaka ug sumbong ngadto sa buhatan ni Presidente Ferdinand “Bongbong” Marcos, Jr. may kalabutan na sa pagsalikway sa mayoryang meyembro sa Sangguniang Panlalawigan nga mapa-ilawom sa state of calamity ang probinsiya pinasikad sa resolusyon nga gipanday sa Provincial Disaster Risk Reduction Management Council.
Si Board Member Jojo Documento sa ilang regular session nagkanayon nga wala na kinahanglana nga madeklarar ang probinsiya nga ilawom sa state of calamity kay kini nahimo nang “moot and academic” kay miabot na ang panahon sa ting-uwan.
Samtang si Board Member Peter Co sa hearing sa Committee of the Whole mipahayag nga wala na kinahanglana nga gamiton ang calamity fund sa probinsiya sanglit aduna nay pundo nga nakapahat sa regular budget para sa paglugway ug ayuda.
Kahinumduman nakahilam-os na daan ug pagsaway ang Sangguniang Panlalawigan kay wala hatagi niini ug hinanaling aksiyon ang resolusyon sa Provincial Disaster Risk Reduction Management Council aron madeklarar nga ipa-ilawom sa state of calamity ang tibook probinsiya.
Sa sayu pa ang buhatan ni Governor Nanay Nene Jalosjos miindorsar sa resolusyon sa Disaster Council sa unang semana sa buwan sa Abril apan ang Sangguniang Panlalawigan mihatag niini ug pagtagad pinaagi sa hearing sa Committee of the Whole sa pagka Mayo 28, 2024. (Angelica T. Obina)
(Source: PIC- Nena Garcia)