Naglusad ug information drive ang Salug Municipal Police Station pinaagi ni PMSg Jarel A. Daguipil sa Women and Children Protection Desk (WCPD) ubos sa pagdumala ni Acting Chief of Police PMAJ Alexie A. Palisoc, alang, kaniadtong Disyembre 8, 2025 sa Barangay Tambalang, alang sa 18-Day Campaign to End Violence Against Women.
Ang mga 4Ps beneficiaries maoy nag-unang mitambong sa kalihokan, nga adunay tinguha sa pagpasabot sa lain-laing porma sa pagpanlupig ug pagpalig-on sa kahibalo sa katawhan aron mailhan ug matubag dayon ang hulga o abusadong sitwasyon sulod sa komunidad.
Gidetalye sa sesyon ang Republic Act 9262 o Anti-Violence Against Women and Their Children Act, nga naghatag ug legal nga proteksyon batok sa pisikal, sikolohikal, sekswal, ug ekonomikong abuso.
Gihisgutan usab ang krimen nga rape, lakip na ang legal nga depinisyon niini, kasagarang sayop nga pagsabot, ug ang importansya sa pagsumbong ug pagtabang sa mga biktima.
Dugang pa, gipasabot ang mga pangunang probisyon sa Anti-Online Sexual Abuse or Exploitation of Children (OSAEC) ug Anti-Child Sexual Abuse or Exploitation Materials (CSAEM) laws, nga nagpalig-on sa depensa sa kabataan batok sa online predators, human trafficking, ug digital exploitation.
Pinaagi sa maong kalihokan, nakadawat ang mga partisipante ug mas lawom nga pagsabot sa ilang katungod, sa mga serbisyo nga ilang maduolan, ug sa papel nga ilang gituohan aron mapugngan ug matubag ang bisan unsang matang sa pagpang-abuso sulod sa komunidad.(IKEN B. GULLEM)
SOURCE: Salug Municipal Police Station