Gipagawas ngadto sa dagat ang 61 ka Olive Ridley sea turtle hatchlings sa Dipolog Boulevard kaniadtong Disyembre 8, 2025, nga nagtimaan ug laing dakong kalampusan sa padayon nga programa sa siyudad alang sa konserbasyon sa kadagatan.
Gipangulohan ang simbolikong pagpagawas ni Dapitan City Mayor Hon. Evelyn T. Uy, kauban si Atty. Gratian Paul R. Tidor, Officer-in-Charge – Assistant CENRO, ug si Mr. Cidur S. Julsadjiri, PENRO Officer.
Daghan usab nga mga lokal nga residente ug mga naglabay ang mitambong aron masaksihan ang kalihokan.
Gipasiugda sa maong aktibidad ang lig-on nga paningkamot sa lokal nga kagamhanan ug mga kaabag sa kalikupan aron maprotektahan ang nesting sites sa mga pawikan ug mapreserba ang marine biodiversity. Importante ang papel sa Olive Ridley sea turtles sa pagmintinar sa himsog nga ekosistema sa dagat, ug ang ilang malampusong pagpagawas nagpakita sa kahinungdanon sa komunidad nga aktibong mosalmot sa pagpanalipod sa kalikupan.(IKEN B. GULLEM)
Source: Dipolog City Government