Pormal nang gilunsad sa Municipality of Salug, pinaagi sa Municipal Nutrition Action Office, ang TUTOK Feeding Program, usa ka 120-day supplemental feeding program alang sa mga batang nag-edad og 6 hangtod 59 ka bulan.
Gipangunahan ang programa ni Municipal Mayor Dr. Ruth M. Brillantes, isip kabahin sa padayong paningkamot sa lokal nga panggamhanan sa pagsiguro sa hustong nutrisyon ug maayong pagtubo sa mga kabataan.
Pinaagi sa programa, hatagan og dugang nga nutrisyon ang mga benepisyaryong bata aron matabangan ang ilang pisikal nga pagtubo ug development, ilabina sa kritikal nga yugto sa ilang unang mga tuig sa kinabuhi.
Gilauman nga ang maong inisyatibo makatampo sa pagpalig-on sa kahimsog ug nutrisyon sa mga kabataan, samtang mapadayon ang mga programa sa LGU nga nagpunting sa kaayohan sa mga bata ug pamilya sa komunidad.
Ubos sa pagpangulo ni Mayor Brillantes, padayon nga gihatagan og prayoridad sa Municipality of Salug ang mga programa nga nagtubag sa panginahanglan sa nutrisyon, kahimsog, ug kaayohan sa mga kabataan.(IKEN B. GULLEM)
Source: Municipality of Salug