Gipahimangnoan ang mga residente sa Tampilisan nga mag-amping tungod sa haze o malabong aso nga nasinati sa pipila ka lugar sa lungsod.
Sumala sa Department of Environment and Natural Resources (DENR), posibleng gikan sa mga forest fire sa Kalimantan, Indonesia, ang haze nga nasinati sa pipila ka bahin sa nasud. Posible usab nga madala kini sa habagat ngadto sa pipila ka lugar sa Visayas ug Mindanao.
Gidasig ang mga residente nga magsul-ob og face mask kung mogawas, likayan ang dugay nga pagpabilin sa gawas ug dili kinahanglan nga outdoor activities, ug mag-amping sa pagdrayb kung moubos ang visibility tungod sa haze. Gipasidan-an usab ang mga bata, tigulang, buntis, ug mga sensitibo sa aso ug polusyon sa hangin nga mag-amping pag-ayo.
Gipahinumdoman ang publiko nga magsalig lamang sa mga opisyal nga impormasyon gikan sa LDRRMO Tampilisan, LGU Tampilisan, DENR, PAGASA, Department of Health, Office of Civil Defense, ug ubang may kalabotan nga ahensya. Ang makasinati og kalisod sa pagginhawa, pananakit sa dughan, grabeng ubo, pagkahilo, o grabe nga iritasyon sa mata, ilong, ug tutunlan kinahanglan mangayo dayon og medikal nga tabang.(JENIFFER JR. DELICA)
Source: LDRRMO Tampilisan