Nagpasalamat ang mga residente sa Barangay Matiag, Siocon Zamboanga del Norte kang Gobernador Darel Dexter T. Uy human mapahigayon ang pag-ayo sa ilang barangay road nga dugay nang naghatag og kalisod ilabi na sa panahon sa ting-ulan.
Ang road rehabilitation, nga gipahigayon pinaagi sa Provincial Engineering Office–Siocon ubos sa pagdumala ni Engr. Dennis de Guzman, Area Engineer, nagpaayo sa kahimtangan sa dalan nga gigamit sa mga mangingisda, motorista, estudyante ug ubang mga residente matag adlaw.
Matud ni Barangay Kapitan Pindaton L. Salam, dakong tabang ang proyekto tungod kay ang maong dalan usa ka hinungdanong agianan sa komunidad. Naglaom usab ang barangay nga sa umaabot mamahimong sementado ang dalan aron mas lig-on ug luwas alang sa tanan.
Nagpasalamat usab ang barangay kang Allan Cameros, Kuyog Ta Coordinator/Monitoring sa Siocon, sa iyang tabang sa pagpahibalo sa kahimtangan sa dalan ngadto sa buhatan sa gobernador.
Kini nga pag-ayo sa kalsada gilauman usab nga makatabang sa pagpalambo sa turismo sa Barangay Matiag, ilabi na sa Dolongin Public Beach, nga nailhan sa puti nga balas ug halapad nga sand bar. Kini nagpakita sa panaghiusa sa probinsyal nga gobyerno ug komunidad alang sa kalamboan sa lalawigan.(IKEN B. GULLEM)
Source: Zamboanga del Norte Provincial News Network