Gisugdan na ang implementasyon sa Mobile Kitchen Van Program sa 3rd District sa Zamboanga del Norte ubos sa liderato ni Cong. Ian Amatong, tumong nga masulbad ang problema sa malnutrisyon ilabi na sa mga bata sa layo’ng mga barangay.
Duha ka Mobile Kitchen Vans ang gi-deploy ug andam na motuyok sa nagkalain-laing eskwelahan ug komunidad aron maghatod og feeding programs ug init, masustansiyang pagkaon. Ang mga van kompleto og pasilidad sa pagluto ug pag-andam sa pagkaon, nga nagpasayon sa paghatag og tabang bisan sa lisod maabot nga mga lugar.
Gawas sa feeding program, gamiton usab ang mga van isip rapid response atol sa kalamidad aron maghatag dayon og pagkaon sa mga apektadong residente.
Sumala sa distrito, ang programa nagpakita sa tin-aw nga paningkamot sa gobyerno nga madala ang serbisyo ug nutrisyon bisan asa, aron masiguro nga walay batang mapabilin nga gutom ug walay tabang.(IKEN B. GULLEM)
Source: Zamboanga del Norte Provincial News Network