Magpatuman na og bag-ong sistema sa paggamit sa mga public gazebo ang City Government sa Dapitan sugod karong umaabot Marso 30, 2026, lakip ang mandatory reservation aron masiguro ang organisado ug hapsay nga paggamit sa lugar.
Sumala sa pahibalo, ang paggamit ug pag-abang sa mga gazebo sa Sunset Boulevard sa Barangay Dawo kinahanglan na ipaagi sa reservation system pinaagi sa City Economic Enterprise Office ug ang mga walk-in nga bisita dawaton lamang kung aduna pay bakanteng slot.
Gipahinumdoman usab ang mga bisita ug residente nga sundon ang “Clean As You Go” o CLAYGO nga pamaagi, sakto nga paglabay sa basura, ug pagrespeto sa mga pasilidad nga gigamit sa publiko. Apil niini ang paglikay sa kadaot sa propiedad, pagpugong sa saba, ug pagsunod sa mga safety measures labi na sa paggamit og grill.
Gipasabot sa lokal nga gobyerno nga ang bag-ong lagda gitumong aron mapreserbar ang kahapsay, kalimpyo, ug kaluwasan sa lugar alang sa tanang mobisita.(IKEN B. GULLEM)
Source: City Government of Dapitan