Nahatagan na og pormal nga legal nga kahimtang ang Cympil Situbo ALSA MASA Farmers Association human madawat ang ilang mga rehistrasyon ug awtoridad gikan sa Bureau of Internal Revenue (BIR), nga magbukas og mas dagkong oportunidad alang sa ilang operasyon.
Niadtong Marso 24, 2026, gipangunahan sa Zamboanga del Norte 2nd Provincial Mobile Force Comoany R-PSB Team ubos sa liderato ni PLTCOL Edwin D. Verzon ang pormal nga turnover sa mga importante nga papeles ngadto sa Cympil Situbo ALSA MASA Farmers Association sa Barangay Situbo.
Apil sa mga dokumentong gitunol mao ang Certificate of Registration (COR), Tax Identification Number (TIN), Authority to Print (ATP), ug ang nahuman nang bulk official receipts. Pinaagi niini, gitugotan na ang asosasyon nga mag-isyu og opisyal nga resibo ug magpadagan og organisado ug transparent nga sistema sa pinansyal nga rekord.
Gilauman nga kini makatabang sa asosasyon sa pagpalapad sa ilang mga kalihokan, pag-angkon og dugang suporta, ug pagpalig-on sa pagsalig sa komunidad.
Sa pagkakaron, ang Cympil Situbo ALSA MASA Farmers Association andam na sa pagdawat og mas dagkong oportunidad samtang nagpadayon sa pag-alagad ug pagpalambo sa sektor sa agrikultura sa ilang lugar.(IKEN B. GULLEM)
Source: Zamboanga del Norte 2nd PMFC