Gisugdan na sa City Government sa Dapitan ang tulo ka adlaw nga intensive training alang sa Barangay Nutrition Scholars (BNS) aron mapalig-on ang ilang kapasidad isip frontliners batok sa malnutrisyon sa komunidad.
Gipahigayon ang Basic Course ug Refresher Training sugod kaniadtong Marso 24 hangtod Marso 26, 2026 sa Government Center Amphitheater, ubos sa City Nutrition Division nga gipangulohan ni City Nutrition Action Officer Ma. Leizel C. Balagapo.
Tumong niini ang paghatag og updated nga kahibalo ug praktikal nga kahanas sa mga BNS, ilabi na sa pagmonitor sa nutrisyon sa mga bata ug pagpatuman sa feeding ug edukasyonal nga programa sa barangay. Lakip niini ang pagbahin sa kasinatian sa mga resource speakers lakip si kanhi City Nutrition Action Officer Eva E. Sagario, samtang si City Local Government Operations Officer Monette S. Ruaya-Ahmad mitabang sa pagpalalom sa pagsabot sa papel sa BNS sa lokal nga pangdumala ug community health.
Kini nga inisyatibo usa ka estratehikong lakang aron masiguro nga ang matag barangay adunay andam ug epektibong nutrisyon frontliners, subay sa mandato sa Presidential Decree No. 1569, ug aron mas mapakusgan ang kampanya batok sa malnutrisyon sa grassroots level.(IKEN B. GULLEM)
Source: City Government of Dapitan