Patay ang usa ka pump attendant human gipusil sa liog sa wala pa mailhing mga lalaki sa Purok Uno, Barangay San Miguel, Liloy, niadtong Septiyembre 10, 2026, alas-12:45 sa udto.
Sumala sa inisyal nga imbestigasyon, duha ka lalaki nga nagsakay sa pula ug puti nga motorsiklo ang mihunong sa usa ka establisemento aron magpakarga og gasolina.
Human sa pagbayad, kalit nga mibunot og armas ang angkas ug gipusil ang pump attendant. Naigo kini sa liog ug dali-daling gidala sa Liloy Rural Health Unit, apan gideklarar siyang dead on arrival.
Narekober sa crime scene ang usa ka empty cartridge case sa .45 caliber ug usa ka ₱50 nga bill, nga giapil sa mga ebidensiya alang sa imbestigasyon.
Samtang, ang mga suspek mikalagiw sakay sa ilang motorsiklo padulong sa Barangay Fatima.
Padayon usab ang hot-pursuit, dragnet ug follow-up operations sa Liloy MPS, uban sa SOCO ug ubang police units, aron mailhan ug madakop ang mga responsable sa krimen.(IKEN B. GULLEM)
Source: PNP Liloy Municipal Police Station