Naglatid og contingency measures ug mga prayoridad sa pondo ang City Disaster Risk Reduction and Management Council (CDRRMC) sa Dapitan atol sa ilang ikatulong-quarter nga miting niadtong Septiyembre 9, 2026, sa New Government Center.
Gipangulohan ni OIC City Administrator Danilo S. Areños Jr., ang miting nagtutok sa koordinasyon sa nagkalain-laing ahensiya ug sa pagkompleto sa city-wide contingency plan batok sa posibleng grabeng epekto sa El Niño. Si Jexter P. Lear sa DOST-PAGASA mipahibalo nga gilauman nga magpadayon ang mas kusog nga El Niño hangtod sa unang bahin sa 2027, nga mahimong magdala og dugay nga dry spell ug taas nga temperatura.
Gipasiugda usab ang mga lakang sa edukasyon, panglawas, agrikultura, suplay sa tubig, ug fire safety. Ang mga school head mahimong magdeklara og localized suspension sa klase kung peligroso ang kahimtang, samtang padayon nga gibantayan sa JRMSU ang heat levels sulod sa campus.
Sa agrikultura, nagpatuman ang siyudad og water delivery sa mga farming areas nga apektado sa hulaw ug motabang sa mga mag-uuma sa pagproseso sa indemnity claims ngadto sa Philippine Crop Insurance Corporation. Ang Dapitan City Water District, City Health Office, ug Bureau of Fire Protection mipresentar usab sa ilang mga lakang aron mapadayon ang serbisyo ug mapanalipdan ang publiko.
Gipresentar usab ang 2027 Local DRRM Fund Investment Plan aron mapalig-on ang disaster preparedness ug climate resilience sa siyudad. Giawhag ang tanang sektor nga magpadayon sa koordinasyon ug pagpangandam samtang nag-uswag ang epekto sa El Niño.(IKEN B. GULLEM)
Source: Dapitan City Government