Isip kabahin sa padayong pagpangandam ug pagpalig-on sa kahibalo sa hustong pagresponde panahon sa linog, miapil ug nagpahigayon ang Zamboanga del Norte Police Provincial Office (ZNPPO) sa 3rd Quarter Nationwide Simultaneous Earthquake Drill (NSED) sa Camp Hamac, Sicayab, Dipolog City, alas-2:00 sa hapon niadtong Septiyembre 10, 2026.
Ubos sa pagdumala ni PCol. Reydante Ariza, Provincial Director sa ZNPPO, gipasiugda niini ang importansya sa pagkaandam, disiplina, ug koordinasyon sa panahon sa emerhensiya.
Atol sa drill, gipraktis sa mga personahe ang hustong pagsunod sa “Duck, Cover, and Hold,” usa sa mga batakang pamaagi sa pagpanalipod sa kaugalingon panahon sa linog. Gipahigayon usab ang tsunami drill isip dugang nga pagpangandam sa posibleng epekto sa kusog nga linog.
Samtang, gidasig ni PLTCOL Ricardo C. Banes Jr., Deputy Provincial Director for Administration, ang mga personahe nga dili lamang isipon ang maong kalihokan isip ordinaryong drill, kondili isip praktis nga ilang magamit sa tinuod nga sitwasyon.
Gihatagan usab niya og gibug-aton ang importansya sa disiplina ug koordinasyon aron masiguro ang hapsay ug luwas nga pagresponde panahon sa aktuwal nga kalamidad.
“In an actual disaster, discipline and coordination can make the difference between an orderly response and a dangerous situation.”
Mitambong sa maong kalihokan sila PLTCOL Bernie Go Bernardino, Jr., Deputy Provincial Director for Operations, PLTCOL Abubakar Ibno, Chief, Police Community Affairs & Development Unit, PCPT Ray Paul C Canonizado, Team Leader, ZDNPMDT, Ms. Michel B. Montederamos, President, ZNPPO Press Corps, ug uban sa mga personahe ug representante sa nagkadaiyang yunit ug ahensya nga misuporta sa earthquake ug tsunami preparedness activities.
Gipasiugda usab ni Mr. Norman M. Alegarbes, Admin and Training Division Head sa PDRRMO, ang importansya sa kanunay nga pagkaandam ug pagkama alerto, ilabina tungod sa sunod-sunod nga mga linog nga nahitabo sa nagkadaiyang lugar, emphasizing na angay magbinantayon.
Pinaagi sa pagsunod sa batakang earthquake safety procedures ug emergency protocols, gipakita sa mga personahe sa ZNPPO ang ilang kahandam ug kahibalo sa hustong mga lakang nga angay buhaton panahon sa linog.
Gipasiugda usab sa ZNPPO nga ang regular nga pagpraktis pinaagi sa mga drill importante aron masiguro nga ang matag personahe makahibalo unsaon paglihok nga kalmado, hapsay, ug disiplinado panahon sa aktuwal nga emerhensiya.(IKEN B. GULLEM)