Namugna ang Provincial Technical Working Committee o PTWC atol sa coordination meeting sa Department of Social Welfare and Development Sustainable Livelihood Program niadtong Agosto 11, 2026, aron palig-onon ang koordinasyon ug pagpatuman sa mga programa panginabuhian sa probinsya.
Gipangunahan ni Governor Darel Dexter T. Uy ang maong miting diin gihisgutan ang kahimtang sa implementasyon sa DSWD Sustainable Livelihood Program, lakip ang mga kalampusan ug mga kakulangon nga nasinati sa pagpatuman niini. Apil sa miting ang mga representante sa DSWD, Technical Education and Skills Development Authority, Bureau of Fisheries and Aquatic Resources, Office of the Provincial Agriculturist, Provincial Veterinary Office ug mga opisina sa kapitolyo.
Pinaagi sa PTWC, gitumong nga maporma ang hiniusang mga estratehiya, maila ang gikinahanglang intervention ug mapalig-on ang koordinasyon tali sa provincial government, national government agencies, local government units ug congressional offices alang sa mga benepisyaryo sa SLP. Gipasiugda ni Governor Uy ang kamahinungdanon sa hiniusang paglihok aron masiguro nga ang mga livelihood program mahimong molambo ug malahutayon.
Gihisgutan usab sa gobernador ang posibilidad sa pagtukod og Satellite Capitol sa Tersero Distrito, partikular sa Liloy, aron mas mapaduol ang mga serbisyo sa provincial government ngadto sa mga lumulupyo sa maong bahin sa probinsya.(JENIFFER JR. DELICA)
Source: Zamboanga del Norte Provincial News Network