Nakadawat og financial ug livelihood assistance gikan sa gobyerno ang duha ka “Friends Rescued” o kanhing mga rebelde sa Zamboanga del Norte atol sa ceremonial turnover nga gipahigayon niadtong Agosto 11, isip kabahin sa duha ka adlaw nga re-orientation sa Enhanced Comprehensive Local Integration Program o E-CLIP sa Dipolog City.
Gitambongan ang kalihukan sa mga representante sa Zamboanga del Norte Police Provincial Office, 97th Infantry “Kalasaglahi” Battalion, Office of the Provincial Governor ug mga Local Government Operations Officers gikan sa nagkalain-laing lungsod sa probinsya. Gipangulohan ni DILG Provincial Director Mario A. Baterna ang kalihukan nga nagtumong sa pagpalig-on sa koordinasyon sa mga ahensya sa pagpatuman sa mga programa alang sa reintegration.
Gisusi usab sa mga partisipante ang mga probisyon sa Joint Memorandum Circular No. 1, Series of 2021 sa Department of the Interior and Local Government ug Department of National Defense, lakip ang mga bag-ong update sa E-CLIP Information System alang sa mas hapsay nga pagmonitor ug paghatod sa serbisyo sa mga benepisyaryo.
Pinaagi sa financial ug livelihood assistance, gitumong nga matabangan ang duha ka benepisyaryo sa pagtukod og panginabuhian samtang nagbalik sila sa ilang mga komunidad. Gilauman sa mga opisyal nga ang padayong pagtinabangay sa national ug local government agencies, law enforcement ug community partners makatampo sa pagpalig-on sa kalinaw ug kalamboan sa Zamboanga del Norte.(JENIFFER JR. DELICA)
Source: Zamboanga del Norte Provincial News Network