Napuno sa mga makalingaw nga aktibidad ug mapuslanon nga sesyon ang 2025 Provincial Children’s Congress nga gipasiugdahan sa Provincial Social Welfare and Development Office (PSWDO) alang sa mga kabataan sa probinsiya, nga gipahigayon sa Zamboanga del Norte Convention and Exhibition Center, kaniadtong Oktubre 21, 2025.
Ang kalihokan nagtumong sa pagpalambo sa kahibalo, kasinatian, ug partisipasyon sa kabataan pinaagi sa mga sesyon bahin sa safety, security, ug leadership. Samtang, sa ikaduhang bahin sa programa, gipahigayon ang usa ka sesyon nga mieksplikar sa mga katungdanan ug responsibilidad sa mga ma-elect nga opisyales sa Children’s Association.
Sa mensahe ni Acting Provincial Welfare and Development Officer Hannah Lou G. Mandantes, gipasabot niya nga ang programa nagtimaan sa potensyal, pagkamamugnaon, ug kaisog sa kabataan nga mahimong mga lider ug tigpasiugda sa kausaban sa umaabot.
Nagpahinumdom usab siya nga ang ideya ug damgo sa matag kabataan adunay dakong bili, ug pinaagi sa ilang tingog, kaisog, ug panaghiusa, matukod ang mas malinaw ug makiangayon nga kaugmaon para sa Zamboanga del Norte.(Iken B. Gullem)
Source: Zamboanga del Norte Provincial News Network