Miapil ang Philippine Statistics Authority (PSA) – PSO Zamboanga del Norte sa opisyal nga pag-abli sa 36th Civil Registration Month pinaagi sa usa ka motorcade nga gipahigayon sa lungsod sa Kalawit, Zamboanga del Norte.
Duyog sa tema karong tuiga, “Navigating the Future Together: Advancing CRVS in Shaping the Global and Regional Data Ecosystem,” nagpunting sa pagpalig-on sa Civil Registration and Vital Statistics (CRVS) alang sa mas lig-on nga sistema sa datos sa nasud ug sa rehiyon.
Gitambongan ang opening ceremony sa nagkalain-laing Department Heads sa lokal nga panggamhanan, mga miyembro sa Sangguniang Bayan, barangay officials, Municipal Civil Registrar ug mga kawani, personnel sa PSA Zamboanga del Norte, ug uban pang ahensya sa gobyerno.
Kini nagtimaan sa pagsugod sa usa ka bulan nga selebrasyon nga nagtumong sa pagpalig-on sa kahinungdanon sa rehistrasyon sa mga vital events sama sa pagkahimugso, kaminyoon, ug kamatayon, isip pundasyon sa tukmang datos alang sa pagplano ug pagpalambo sa mga programa sa gobyerno.(IKEN B. GULLEM)
Source: PSA ZAMBOANGA DEL NORTE