Miubos og 38.93 porsyento ang kinatibuk-ang krimen sa Cebu City sa Enero 2026 kumpara sa Enero 2025, sumala sa datos nga gipagawas sa Cebu City Police Office (CCPO).
Base sa report, gikan sa 596 ka kaso sa Enero 2025, mikunhod kini ngadto sa 364 ka kaso sa Enero 2026. Matod sa CCPO, resulta kini sa mas hugot nga kampanya batok sa krimen, mas aktibong police operations, ug mas lig-on nga panagtinabangay sa komunidad ug lokal nga gobyerno.
Sa Index Crimes, mikunhod gamay ang kaso gikan sa 59 ngadto sa 57. Ang murder niubos gikan 8 ngadto 7, samtang ang rape niubos gikan 8 ngadto 5. Ang robbery niubos usab gikan 6 ngadto 3. Apan misaka ang physical injuries gikan 11 ngadto 13 ug theft gikan 26 ngadto 28. Nakarekord usab og usa ka kaso sa carnapping karong tuiga.
Sa Non-Index Crimes, dako ang pagkunhod gikan 426 ngadto 275 ka kaso. Labaw sa tanan, ang vehicular ug traffic-related incidents miubos pag-ayo gikan 110 ngadto 32 ka kaso, o kapin 70 porsyento nga pagkunhod.
Sumala sa CCPO, nakatabang sa maong resulta ang paggamit sa teknolohiya sama sa CCTV ug social media monitoring, dugang sa mas daghang police visibility, night patrols, checkpoints, ug pagpatuman sa Oplan Bulabog ug Oplan Pakigsandurot uban sa Cebu City Government.
Gipasabot sa CCPO nga magpadayon sila sa ilang paningkamot aron mapabiling malinawon ug luwas ang Cebu City alang sa tanang Sugboanon.
Source: CCPO
I via Renante Socia Lada