Naglusad og aksyon ang Land Transportation Office (LTO) batok sa 21-anyos nga drayber nga nalambigit sa hit-and-run incident sa Cebu City nga miresulta sa kamatayon ni Kingston Ralph Cheng, usa ka batan-ong negosyante, niadtong miaging gabii.
Sumala sa report, kusog nagpadagan ang suspek nga si Sean Andrew Pajarillo sa iyang sakyanan ug nabangga niini ang laing awto sa dalan. Bisan pa sa nahitabo, wala kini mohunong ug nagpadayon sa pagpadagan hangtod nga naligsan ang usa ka pedestrian nga si Cheng.
Tungod sa kusog sa impact, nalabay pa ang biktima padulong sa poste sa kuryente.
Ang motorista nakasinati usab og samad ug gidala sa tambalanan alang sa pagtambal. Sa pagkakaron, gipailalom siya sa kustodiya sa kapulisan samtang giandam ang kasong homicide nga ipasaka batok kaniya.
Gipahibalo sa LTO nga ilang kuhaon ang driver’s license sa suspek ug posible usab nga permanenteng dili na siya tugotan nga makadrayb.
Giawhag usab sa ahensya ang publiko nga i-report ang mga iresponsableng drayber aron malikayan ang susamang insidente ug masiguro ang kaluwasan sa tanang naggamit sa dalan.
Source: LTO
I via Renante Socia Lada