Nakig-uban ang Philippine Statistics Authority (PSA)-Zamboanga del Norte sa pagsaulog sa 52nd Nutrition Month karong Hulyo 2026 aron suportahan ang panawagan alang sa mas maayong nutrisyon, panglawas, ug food security sa mga Pilipino.
Gipasiugda sa selebrasyon ang tema nga “Sa Philippine Plan of Action for Nutrition (PPAN): Sama-sama sa Nutrisyong Sapat Para sa Lahat,” uban sa sub-theme nga “Nutrisyon at Kalikasan, Ating Pangalagaan!”
Gitumong sa maong kampanya ang pagdasig sa mga ahensya sa gobyerno, lokal nga panggobyerno, civil society organizations, pribadong sektor, ug mga komunidad nga magtinabangay sa pagpanalipod sa panglawas ug kalikupan.
Gipasiugda usab nga ang pagpanalipod sa kalasangan, kadagatan, yutang pang-agrikultura, ug mga tinubdan sa tubig importante sa pagsiguro sa lig-on nga suplay sa pagkaon ug pagpadayon sa access sa masustansiyang pagkaon alang sa umaabot nga mga henerasyon.
Kini nga Nutrition Month usa ka tinuig nga selebrasyon nga nagtumong sa pagpalapad sa kahibalo ug pagpalig-on sa kolektibong aksyon alang sa pagpauswag sa nutritional status sa mga Pilipino, subay sa Presidential Decree No. 491 o Nutrition Act of the Philippines.(IKEN B. GULLEM)
Source: PSA Zamboanga del Norte