Mikabat sa 200 ka kabataan gikan sa nagkalain-laing lungsod ug munisipyo sa Zamboanga del Norte ang mitambong sa Provincial Children’s Congress nga gipahigayon sa Olingan Sports Complex sa Dipolog City.
Gisentro ang kalihokan sa tema nga “Equitable Participation and Education as the Foundation of a Safe and Empowered Future,” nga nagtumong sa pagpalig-on sa patas nga partisipasyon, edukasyon, ug proteksyon sa mga kabataan isip pundasyon sa usa ka luwas ug mas maayong kaugmaon.
Gipangulohan ang kalihokan ni Governor Darel Dexter T. Uy, nga girepresentahan ni Vice Governor Julius Napigquit.
Sa iyang mensahe sa pag-abli sa programa, gidasig ni Acting PSWDO Head Hannah Lou G. Mandantes ang mga kabataan nga magtukod og lig-on nga panaghigalaay ug maayong grupo sa mga kasaligan. Matod niya, importante kini tungod kay ang mga lider sa umaabot nagkinahanglan og mga tawo nga ilang masaligan ug katuwang.
Kabahin usab sa kalihokan ang usa ka mahinungdanong simposyum nga nagtuki sa nagkalain-laing isyu nga may kalabotan sa kaluwasan, proteksyon, ug kaugmaon sa mga kabataan.
Si Pat. Vernulfo C. Teus sa Community Org. PNCO, PCADU-ZNPPO, mipahibalo sa mga partisipante bahin sa “Nihilistic Violence Extremism” ug sa mga peligro nga mahimong resulta sa pag-apil sa makadaot ug bayolenteng mga kalihokan.
Gihisgutan usab ni Child Participation Officer Lovely Belotendos ang “Child Protection: Personal Safety Lesson,” nga nagtudlo sa mga kabataan sa kahinungdanon sa pagpanalipod sa ilang kaugalingon.
Samtang, si POPCOM Officer Ma. Teresa Paquibot mipresentar sa hilisgutan nga “Teenage Pregnancy: Dreams First, Parenthood Later,” diin gidasig ang mga kabataan nga unahon ang ilang edukasyon, mga pangandoy, ug mga tumong sa kinabuhi.
Gipadayon ang kalihokan pinaagi sa Amazing Race, diin aktibong nakigbahin ang mga kabataan sa upat ka estasyon: Puzzle, Mission Possible, Message Relay, ug Finding the Hidden Objects.
Pinaagi niini, napalambo ang ilang abilidad sa pagtinabangay, komunikasyon, pagsulbad sa mga hagit, ug pagpakita sa kaisog samtang naglingaw-lingaw.
Malampusong gitapos ang Provincial Children’s Congress nga adunay mensahe nga ang hustong edukasyon, paggiya, proteksyon, ug aktibong partisipasyon sa mga kabataan importante aron sila maandam sa pagtukod og kaugmaon nga luwas, hayag, ug puno sa oportunidad.
Gilauman nga pinaagi sa padayong suporta sa mga ginikanan, komunidad, ug pangagamhanan, ang mga kabataan sa Zamboanga del Norte mahimong mas lig-on ug andam nga mahimong mga responsableng lider sa umaabot.(IKEN B. GULLEM)
Source: Zamboanga del Norte Provincial News Network