Dali nga mitubag ang Shift A EMS duty personnel sa Liloy Municipal Fire Station sa usa ka insidente sa Brgy. Compra, Liloy, Zamboanga del Norte.
Ubos sa pagpanguna ni FSINSP Dave C. Dela Cruz, Acting Municipal Fire Marshal, mitambong ang mga emergency medical responder sa maong insidente aron mahatagan og unang medikal nga pag-atiman ang biktima.
Pag-abot sa mga responder sa lugar, ilang nasuta ang usa ka pasyente nga dili makasulti apan may panimuot, responsive, ug nakalakaw pa padulong sa EMS personnel. Matod sa pamilya, gipaak sa bitin ang pasyente sa iyang tuo nga batiis.
Gialalayan dayon ang pasyente pagsulod sa BFP ambulance ug gihatagan og tukmang first aid. Gilimpyohan ang samad gamit ang sterile water ug gitabonan og angay nga dressing aron maminusan ang risgo sa impeksyon.
Padayon usab nga gibantayan sa mga responder ang kahimtang sa pasyente samtang gihatagan siya og supportive care. Human niini, gidala siya sakay sa BFP ambulance ngadto sa Liloy Integrated Health District Hospital alang sa dugang nga medikal nga eksaminasyon ug tukmang pagtambal.
Padayon nga gi-monitor ang pasyente atol sa biyahe hangtod nga luwas siyang nakaabot sa ospital. Pag-abot didto, hapsay siyang gitugyan ngadto sa mga medical staff, lakip ang resulta sa initial assessment ug mga first aid nga nahatag kaniya atol sa pre-hospital care.(IKEN B. GULLEM)
Source: BFP R9 Liloy fire Station