Nagpatigayon og provincial-level training ang Provincial Statistical Office (PSO) sa Zamboanga del Norte alang sa mga kalihokan sa Project 1MAP: One Map for All Project.
Gihimo ang pagbansay gikan Septiyembre 8 hangtod 11, 2026 sa opisina sa PSO sa 4th Floor, A4M Building, Arellano Extension, Miputak, Dipolog City.
Walo ka personahe ang miapil sa maong kalihokan, lakip ang duha ka Provincial Map Data Reviewers, tulo ka Map Data Processors ug tulo ka Map Data Verifiers. Gitutokan sa training ang hustong paghimo sa mapa, pagkolekta sa datos ug pagproseso niini.
Tumong sa maong provincial activity nga mapalambo ang teknikal nga kahibalo ug kahanas sa mga personnel sa pag-update ug pag-adopt sa mga utlanan sa mga lungsod ug munisipyo nga gisumite sa mga Local Government Units (LGUs) human sa 2026 Map Research Activity.
Kini nga pag-verify mahinungdanon sa maong mga boundary data isip preparasyon sa umaabot nga mapping operations alang sa 2027 Community-Based Monitoring System (CBMS) ug sa mga mosunod nga census nga ipatuman sa Philippine Statistics Authority (PSA).
Giawhag usab sa PSO ang mga partner agencies, LGUs ug uban pang stakeholders nga magpadayon sa ilang suporta sa Project 1MAP aron masiguro ang hapsay, sistematiko ug tukmang pagpatuman sa 2027 CBMS.(IKEN B. GULLEM)
Source: PSA Zamboanga del Norte