Nagpahigayon og duha ka adlaw nga capacity building sa Child Protection in Emergencies (CPIE) ang ChildFund Philippines uban sa pakigtambayayong sa City Government of Dipolog pinaagi sa City Social Welfare and Development Office (CSWDO) niadtong Abril 6 ug 7, 2026, diin gipahigayon ang unang adlaw sa Social Hall sa Museo Dipolog samtang ang ikaduhang adlaw didto sa Top Plaza Hotel.
Kini nga kakihokan kabahin sa implementasyon sa Comprehensive Emergency Program for Children (CEPC) ug nagtumong sa pagpalig-on sa kapasidad sa mga lokal nga opisyal ug frontline workers sa pagpanalipod sa mga bata atol sa mga emerhensiya ug kalamidad.
Mitambong sa maong training ang Assistant City Social Welfare and Development Officer nga si Jovencia D. Gregory, uban sa mga personahe sa CSWDO ug mga representante gikan sa nagkadaiyang partner agencies.
Nagsilbi usab nga mga resource speaker ang pipila ka opisyal ug kawani, lakip sila Rhea Sabandal, Herma P. Campos, Roel R. Zorrilla, Ruby Mae D. Agpasa, ug Ana Marie Ello sa Commission on Population and Development, ingon man ang mga personnel sa City Disaster Risk Reduction and Management Office.
Sa mensahe sa lokal nga panggamhanan, girepresentar ni City Councilor Atty. Jonald C. Napigquit ang mayor sa siyudad ug gipasiugda ang padayon nga paningkamot sa gobyerno sa pagpalig-on sa child protection mechanisms, ilabi na sa panahon sa kalamidad.(IKEN B. GULLEM)
Source: Dipolog City Government