Nadakpan sa kapulisan sa Mandaue City Police Office kon MCPO ang usa ka High-Value Individual (HVI) nga gidudahang nalambigit sa ilegal nga drogas, human masakmit gikan kaniya ang kapin 2 ka kilo sa shabu nga nagkantidad og ₱13.6 milyon.
Pasado alas 11:14 kagabii, Abril 6, 2026, Sitio Sudlon, Brgy. Maguikay, Mandaue City.
Ang suspetsado nga giila sa alyas “Gorio,” 24 anyos, ulitawo ug usa ka electrician, residente sa Sitio Elma, Barangay Cogon Pardo, gipasanginlan sa paglapas sa Section 5 (sale of illegal drugs) ug Section 11 (possession of illegal drugs) ubos sa Republic Act 9165 o Comprehensive Dangerous Drugs Act of 2002.
Sumala sa intel assessment, si Gorio giila nga naglihok isip “bodegero” ug “kabayo” sukad Enero 2026, diin pinaagi sa iyang network, nakapalapad siya sa iyang operasyon sa Mandaue City ug Cebu City. Ang iyang mga transaksyon gihimo pinaagi sa cellphone ug GCash, diin ipadala una ang bayad sa supplier ug ihatud lamang ang drogas human makumpirmar ang bayad.
Base sa monitoring, kaya sa suspetsado ang pagbaligya og 500 gramos hangtod 1 kilo sa shabu kada semana depende sa demand. Nakadawat usab siya og komisyon nga ₱10,000 matag kilo nga iyang mapahimutang, samtang magdepende ang iyang kita sa kadaghan sa drogas nga iyang ma-deliver.
Gipadayon karon ang imbestigasyon batok sa suspetsado ug ang posibleng mga kauban niini sa ilegal nga operasyon, samtang giandam ang pagpasaka sa kaso batok kaniya. Nagpasalig ang kapulisan nga ipadayon ang ilang kampanya batok sa ilegal nga drogas aron mapanalipdan ang komunidad.
Source: MCPO
I via Renante Socia Lada