Gipasidunggan sa Cebu Provincial Capitol ang kapin 300 ka Barangay Health Workers (BHWs) gikan sa nagkalain-laing lungsod sa probinsya atol sa selebrasyon sa Barangay Health Workers Day nga gihimo kagahapon Abril 7, 2026.
Ang kalihokan nagtigom sa mga health frontliners sa barangay alang sa usa ka adlaw sa pag-ila ug pagkat-on. Usa sa highlights sa programa mao ang seminar nga gipangunahan ni Servil Mae Vallespin sa Department of Health Region 7, diin gihisgutan ang importante nga mga isyu sa panglawas.
Gibase sa tema nga “BHWs: Haligi sa Panglawas sa Barangay,” gihisgutan sa kalihokan ang mga topik sama sa immunization, pagtambal sa kanser, sayong pag-detect sa breast cancer, ug ang kamahinungdanon sa safe sex.
Gihatagan usab og pasidungog ang mga outstanding BHW coordinators ug mga dugay nang nagserbisyo nga health workers gikan sa nagkalain-laing lungsod. Ang uban sa mga awardees nakaserbisyo na sulod sa kapin 35 ka tuig sa ilang komunidad.
Ang maong kalihokan gi-organisar sa Provincial Health Office uban sa Community Health Workers Association of Cebu Province Inc., isip pagpakita sa padayon nga suporta sa probinsya alang sa mga frontliners sa panglawas.
Source: Cebu Province PIO
I via Renante Socia Lada